Tras varias tempadas de presenza do TEAM NUPEL no Campionato de España, considerouse chegado o momento de multiplicar o apoio ao deporte do automóbil e fixarse novos retos a partir da próxima tempada, na que comezará a incursión no Campionato do Mundo de Rallys e se ampliará a participación no Campionato de España, á parte doutros proxectos que se están a xerar.

O salto cuantitativo e cualitativo na actividade do TEAM NUPEL, esixiu a implantación dun novo deseño organizativo e dunha estrutura de dirección e coordinación, denominada NUPEL GLOBAL RACING.

Un dos retos que se afrontarán esta tempada é o proxecto denominado RAS·RALLY, consistente nun proceso de formación de mozos deportistas que teñan verdadeira ilusión en converterse en pilotos de rallys. Este proxecto, dirixido persoalmente por Luis R. Moya, permitirá  formar novos pilotos NUPEL, que competirán dentro da estrutura do equipo.

A presentación pública dos plans deportivos do NUPEL GLOBAL RACING terá lugar a primeiros de decembro. Dende esta páxina iremos informando puntalmente das novidades que vaian xurdindo neste e noutros proxectos do Equipo.

Proximamente poñerase en liña unha web específica do evento, na que se publicarán as bases definitivas e o formulario de inscrición na LUIS MOYA RALLY SCHOOL.

A candidatura ao título nacional de rallyes do TEAM NUPEL viuse reforzada tras visitar terras andaluzas. Á vitoria no Rallye Serra Morena dos irmáns Vallejo, únese nesta ocasión o segundo posto de Xevi Pons e Alex Haro, repetindo así o conseguido polo equipo no Rally de Ourense.

Co resultado desta proba e restando só dúas citas para rematar o certame, o Rally Costa Brava en Cataluña e o Shalymar en Madrid, existen serias opcións de alzarse co triunfo final, obxectivo que se marcara o TEAM NUPEL a comezos de tempada. Os puntos obtidos en Andalucía permiten a Xevi Pons recuperar o liderado na clasificación xeral do Campionato de España e que Sergio Vallejo anote a cuarta vitoria da tempada e dea un paso adiante na carreira cara ao título.

En declaracións aos medios de comunicación, o Team Manager de NUPEL, Luis Moya, mostrouse moi satisfeito co resultado, indicando que “todo saíu á perfección e non deixa de sorprenderme o ben que se están a facer as cousas polos pilotos e por todo o equipo. Os técnicos, dirixidos por Oscar Veiga, fixeron un extraordinario traballo cos dous Porsche, que non deron ningún problema durante todo o rallye. Agora temos que intentar seguir na mesma liña de traballo para rematar a faena nas seguintes probas“.

Referíndose ao desenvolvemento do rallye, o lucense Sergio Vallejo manifestou que “ao principio tivemos unha interesante loita con Fuster e Pons. Despois de moitos quilómetros, rematamos a mañá só tres segundos detrás de Miguel e catro diante de Xevi. O ritmo era bastante alto e calquera pequeno erro descolgaríanos da loita pola vitoria e nesta ocasión tocoulle errar a Fuster no primeiro treito da tarde. Iso púxonos as cousas máis doadas. Nos tres  derradeiros treitos gocei doutro xeito do rally, co público animando con ganas, polo que lles dou as grazas de corazón“.

Xevi Pons, que cumpría perfectamente coa formulación inicial do rallye, sinalou que “todo foi moi ben co novo coche e non tiven ningún problema para adaptarme, porque xa o coñecía tras disputar con el os dous últimos rallys da pasada tempada. Corrín moito dende o primeiro quilómetro para estar o máis arriba posible, pero consciente de que non debería cometer erros. O resultado final respondeu ás nosas intencións iniciáis“.

CLASIFICACION RALLYE SERRA MORENA

1º – Sergio Vallejo / Diego Vallejo – Porsche GT3 NUPEL -1 h 51 min 51,7 seg

2º – Xevi Pons / Alex Haro – Porsche GT3 NUPEL – a 58,5 seg

3º – Manuel Aviñó / Nacho Aviñó – Porsche GT3 – a 2 min 25,9 seg

4º – Alberto Monarri / Alberto Chamorro – Impreza N14 Plus – a 3 min 18,8 seg

5º – Joan Vinyes / Enrique Velasco – Clio R3 – a 6 min 1,1 seg

.

CLASIFICACION XERAL CAMPIONATO DE ESPAÑA (PUNTOS NETOS)

1º – Xevi Pons – Mitsubishi Evo X Plus NUPEL -225,5 puntos

2º – Enrique García – Impreza N14 Plus -220,5 puntos

3º – Sergio Vallejo – Porsche GT3 NUPEL -205,0 puntos

4º – Miguel Fuster – Porsche GT3 CV -170,0 puntos

5º – Jonathan Pérez – Clio R3 – 131,0 puntos

Os pilotos da selección Volante Xoven, ADRIAN DIAZ e JOSE CARLOS GUARC continúan co programa de formación comezado semanas atrás no circuíto da Pastoriza, cunha xornada de test organizada polo Equipo Miño-Lugo. Nesta xornada de probas tiveron a súa primeira toma de contacto co Mitsubishi, que puideron probar a conciencia no tramo do Veral.

Tanto Adrián Díaz coma José Carlos Guarc mostráronse moi satisfeitos coas prestacións do Mitsubishi, así como especialmente agradecidos aos pilotos do Team Nupel – Sergio Vallejo / Xevi Pons – por toda a información que lles facilitaron durante o test e, especialmente, por estar involucrados no proceso da súa preparación deportiva.

Adrián e José Carlos están ansiosos por debutar aos mandos dos Mitsubishi no Rally San Froilán, aínda que se amosaron cautos e convencidos de que hai que continuar traballando e esforzándose sempre en mellorar.

Sorte para ambos os dous.

Como éxito absoluto pode cualificarse a participación do NUPEL Rally Team na 42ª edición do Rally de Ourense, xa que os seus vehículos coparon tres das catro primeiras posicións da clasificación final da proba. Co resultado obtido, Xevi Pons xa encabeza a clasificación xeral do Campionato de España, ademais de consolidarse no liderado de grupo N e Sergio Vallejo suma a súa segunda vitoria absoluta da tempada, polo que ambos os dous contan con serias opcións para conseguir o título absoluto no nacional de rallys.

O rally comezou co claro dominio do Mitsubishi Evo X durante toda a mañá, precedendo na clasificación ao Porsche do seu compañeiro de equipo, Sergio Vallejo, e ao do alacantino Miguel Fuster, chegando ao ecuador da proba cunha vantaxe de 30 segundos. Por detrás deles, unha lexión de Mitsubishi, comandada polo ourensano Rantur e entre os que tamén se encontraba o piloto do Team Nupel, Alvaro Muñiz, loitaban entre si por ocupar lugares destacados na clasificación xeral.

Se os tramos da mañá, moi sucios e rotos, resultaban claramente favorables para as características dos vehículos da marca nipoa, os da tarde presentaban unhas condicións máis vantaxosas para os GT. Estas condicións, unidas á elección polo Mitsubishi dun composto de gomas que ao cabo se mostrarían menos eficaces, así como polo forte ritmo dun Vallejo “despeiteado” no mítico Canón do Sil, axustaría ao máximo as posicións na loita pola vitoria no rally que, ao cabo, acabarían conseguindo Sergio e Diego Vallejo por tan só 7 segundos.

A participación do coruñés Alvaro Muñiz, copilotado por César Blanco, non pasou desapercibida para os afeccionados ao motor, que puideron gozar da súa espectacular condución durante toda a xornada e que levou ao segundo Mitsubishi Evo X do Team Nupel á cuarta posición do rally e ao podio na Evo Cup.

Outro foco de atención estivo no vehículo histórico (Porsche 911 RSR) que o Team Nupel encomendou a insigne parella formada por Fernández e José Luis Sala. A parella galega inundou os tramos de recordo co inesquecible son e a elegante presenza dun vehículo mítico no mundo dos rallys. Unha pena que un pequeno problema co “delco” lles hobligó a regresar ao parque de traballo a falta de catro especiais para completar o percorrido. Todo apunta a que esta non será a última aparición nesta tempada do Porsche 911 RSR – Nupel.

CLASIFICACION 42 RALLY DE OURENSE

1º – Vallejo-Vallejo – Porsche GT3 NUPEL – 2:07:50,3

2º – Pons-Haro – Mitsubishi Evo X NUPEL – 2:07:57,3

3º – Rantur-Cid – Mitsubishi Evo X – 2:10:33,5

4º – Muñiz-Blanco – Mitsubishi Evo X NUPEL – 2:11:50,0

5º – Cabanela-López – Mitsubishi Evo X – 2:13:13,3

CLASIFICACION PROVISIONAL CAMPIONATO DE ESPAÑA

1º – Xevi Pons – Mitsubishi Evo X NUPEL -157,5 puntos

2º – Miguel Fuster – Porsche GT3 CV -140 puntos

3º – Enrique García – Subaru – 121,5 puntos

4º – Sergio Vallejo – Porsche GT3 NUPEL -87,5 puntos

5º – Xavier Lujúa – Mitsubishi – 69 puntos

.

CLASIFICACION XERAL GRUPO N

1º – Xevi Pons – Mitsubishi Evo X NUPEL -187,5 puntos

2º – Enrique García – Subaru – 140 puntos

3º – Xavier Lujúa – Mitsubishi – 79 puntos

A próxima cita do Campionato de España de Rallys de Asfalto disputarase o último fin de semana do mes de agosto en Ferrol.